MIT ou GPL, esa é a cuestión

Se usas Software Libre, apoias e cres que é a mellor opción para o software no futuro...

MIT ou GPL, esa é a cuestión

Se usas Software Libre, apoias e cres que é a mellor opción para o software no futuro e ademais es un desenvolvedor de software, non tes moitas excusas para non liberar cunha licencia de Software Libre. Como nota ao marxe, salientar que non só os programadores desenvolven Software Libre: tamen aportan os documentadores, probadores, deseñadores gráficos, distribuidores...

O argumento definitivo para convencerte de que debes liberar o código que teñas desenvolvido é o seguinte: se gardas o código con celo no caixón é moi probable que morra no caixón! Trata de lembrar código que teñas feito e pensa, coa rapidez coa que avanza o mundo da informática, se aínda hoxe tería aplicación. Fai o exercicio de revisar os teus repositorios privados e sorpréndete. Como desenvolvedor individual hai outro motivo interesante: publicar os teus traballos é o mellor currículum que podes ter. Mesmo hai empresas adicadas exclusivamente á caza de talento examinando o código publicado en GitHub.

Imaxe "Diagrama de licencias de software segundo a FSF" - source: https://en.wikipedia.org/wiki/Software_license

Se dirixes unha empresa de desenvolvemento de software, podes estar cavilando por que demo ías liberar e deixar que todo o mundo teña acceso ao código... Hai varios motivos, pero o principal é que os consumidores de software valoran que os programas que se executan nos seus equipos sexan OpenSource (auditables, seguros, adaptábeis). No caso de empresas que usan o teu software é fundamental que poidan controlar a súa información e que non exista unha dependencia do fornecedor (terás que ser bo dando o servizo, nada máis e nada menos). Se contratas coa administración, chegará un día en que será requisito imprescindible que o software pagado por todos sexa para todos (isto debemos esixilo os cidadáns!).

Ao medo de que a competencia poida usalo gratis... É o mellor que che pode pasar! Creas unha dependencia do teu código e terán que nomearte nos créditos. Hai un mellor argumento comercial? O que tes que estudar é se ten sentido liberar todo o que desenvolves. En teoría é o mellor, pero por favor, se o código é feo ou malo non o liberes! O ideal é liberar o código e liderar o desenvolvemento baseado na comunidade. Liberar un software que vai ser adoptado pola comunidade e, á vez, darlle soporte e incorporar as melloras que poidan aportar desenvolvedores externos é crear un produto de éxito garantido. Se ademais liberas antes que a competencia, será difícil que outro ocupe o teu lugar ou nicho de mercado.

Imaxe "Logo da licencia GPL" - source: https://www.gnu.org/graphics/license-logos.html

A estas alturas xa deberías estar convencido de liberar o teu software e queres saber como. Pois é ben doado: só tes que usar unha licencia de Software Libre ou Open Source. A decisión de usar unha licencia Open Source sempre é mellor que a que sexa privativa, pero se engades restriccións de uso que impiden que sexa Software Libre (véxase as 4 liberdades do software) non estará ben visto e posiblemente non recibas apoio da comunidade. Isto tamén limita a posibilidade de crecer en rede exponencialmente e pode que apareza unha solución equivalente realmente libre que che faga sentir que perdeches o tempo.

Dentro das licencias libres tes moitas onde escoller que se poden agrupar nunha permisiva "MIT" ou nunha vírica "GPL". Coa MIT basicamente darías permiso para facer co teu código o que se queira (preservando dereitos de autoría), mentras que cunha GPL tamén impós a obriga de que os traballos derivados continúen a ser GPL. Se es puramente estricto na definición de liberdades escollerás MIT pero corres o risco de que alguén empregue o teu código e a continuación o peche nunha solución privativa. Por contra, coa GPL estaría obrigado a producir software licenciado tamén baixo GPL co sentido de que o Software Libre tenda a prevalecer sobre o privativo.

Con todo, sexa MIT ou GPL, libera o teu código!