Empresas explotadoras que «non saen do armario»

Artigo de opinión, onde se analiza o ecosistema do Software Libre

Empresas explotadoras que «non saen do armario»

Estar en contacto con empresas competidoras e sobre todo con aquelas que son máis colaborativas permíteme coñecer máis de preto as tecnoloxías que utilizan para ofrecer os seus produtos e servizos. É Software Libre, en maior ou menor medida, usan Software Libre, pero non todas o din, «non queren saír do armario», aínda.

CC0 Creative Commons - https://pixabay.com/es/hacker-internet-tecnologia-1569744/

O ecosistema de Software Libre é moi variado. Hai xente que xera o código, son as persoas que desenvolven ese software; outras o traducen e adáptano á cultura de cada lugar, son as de localización (l10n); tamén hai xente que usa e reporta os erros para melloralo e sometelo a diferentes situacións, sería o equipo de calidade; outras persoas son de deseño e realizan eses grafos, iconas, ou debuxos que emprega o software; e así moita xente máis. En xeral son persoas, particulares que se reúnen periódicamente para facer esas «quedadas» tan importantes onde intercambian as súas vivencias, póñense cara e proxectan o futuro dunha ferramenta pola simple motivación de facer algo mellor polo mundo e darllo libremente.

Comparten coñecemento e non piden nada a cambio.

Este ecosistema tamén ten as súas necesidades, é xente que come, algunha ten familia e sobre todo gústalle moito o Software Libre e encantaríalle vivir diso. Son persoas que aman o que fan. Táchaselles de« anti-sistema», porque non entenden o mundo capitalista estándar…

Hai dúas cousas que unen ás empresas explotadoras e á Comunidade de Software Libre: o código fonte e o diñeiro. Iso si, cada unha cun enfoque antagonista pero ó fin e ó cabo ambas necesitan deles para subsistir.

CC0 Creative Commons - https://pixabay.com/es/p%C3%A1gina-web-htlm-c%C3%B3digo-programaci%C3%B3n-2341973/

As empresas explotadoras, esas que utilizan o código e non o recoñecen, teñen karma negativo, non achegan nada á Comunidade pero lúcranse co Softlware Libre (para que logo digan que é gratis). Esta Comunidade á súa vez peca de hippie e de facer as cousas polo «ben común» cando debería ser máis esixente co uso que se fai dos seus desenvolvementos.

As empresas son as que xeran riqueza, pero esta debe estar ben dirixida cara á Comunidade de Software Libre que é a que xera os recursos que son explotados.

Como mellorar o karma das empresas? De moitas maneiras. Desde que simplemente patrocinen eventos de Software Libre (non de Open Source, a secas) ata que contraten a esas persoas da Comunidade que aman o traballo desinteresado que realizan. O talento escasea e a demanda é moi alta. Ter no equipo a esas persoas que gozan co que fan é o mellor regalo que se lle pode facer á Comunidade de Software Libre.

Carlos Rodríguez García Presidente de AGASOL presidencia@agasol.gal